Не е новина моќното мнозинство да ги трујат научните институции како МАНУ со роднински, пријателски, швалерки и други основи, реагира историчарот Васко Гичевски за скандалот во Македонската академија каде беше исфрлен научник со светско реноме а во игра да остане професорка со десет пати полош научен скор.
Историчарот меѓу редови на Фејсбук вели дека однесувањето на Одделението за општествени науки при МАНУ во случајот со Драги Митревски е срам за науката и токму тоа ќе биде една од неколку причини за тивкото умирање на научните и високообразовните институции.
,,Ова не е некоја новина во МАНУ. Не сум бил дел од таа фела, но познавам премногу луѓе од академската елита, кои меѓу другото раскажуваа и вакви приказни, па дури и малку поморбидни. Тоа се едни подводни гребени, кои ќе се интересни во иднина, сега веројатно би биле само трач муабети.
Се радувам што некој реши да напише нешто на ачик, за ваквите нешта во највисоките кругови на нашата наука. Лично говорејќи јас никогаш не сум ги сметал за високи, круговите кои работат вака, а има едно убаво мнозинство кое ги отру научните институции со своите роднински, пријателски, швалерки и секакви други основи за стекнување и напредување во звање. Тоа е срам за науката и токму тоа ќе биде една од неколку причини за тивкото умирање на научните и високообразовните институции.
Јас можам да кажам дека ми е чест што го познавам Драги Митревски и дека неговото дело и труд и онака добија култен статус и трајна вредност во археологијата”, пишува Гичевски.
Повеќе детали за случајот во МАНУ кој е скандалозен по повеќе основи на овој ЛИНК